Lalayon tano phekaneg ko mga Salafi taman ko mga Ulama iran gyangkai a katharo “Ba ami mambo piyakatana a Anggawta so mga Lima o Allah? Sekano bo man i miyamakatana ron sa Anggawta“. Gyai na di iran di matharo sabap sa di ran makekenal so thito a Aqeedah/Manhaj o mga Salafi.
Katii so mga kailangan a katokawan iran:
1. Aya Aqeedah a miyapanothol ko mga Salaf na da a sifat o Allah a Anggawta ago piyakatana iran anan.
2. Aya kepit o mga Ashairah na da a sifat o Allah a Anggawta ago piyakatana iran anan mambo.
3. Aya kepit o mga Salafi (imanto a masa) na Muhdath (Bid’ah) so katharo a “Anggawta” sabap roo na Di khapakay a tharoon a Aden a anggawta o Allah ogaid na di pen khapakay tharoon a Da a anggawta iyan.
Aya maana niyan na aya thito a moonot ko Aqeedah o mga Salaf na so mga Ashairah.
KATII SO DALIL A SO MGA SALAF NA PIYAKATANATANA IRAN A SO ALLAH NA ANGIYAS KO SIFAT A ANGGAWTA
1. Phitaro o kasasarigan a Muhaddith, Faqeeh ago Hujjatul Islam ko mga Salaf, Imam Tahawi (239 AH – 321 AH) :
هذا ذكر بيان عقيدة أهل السنة والجماعة على مذهب فقهاء الملة أبي حنيفة النعمان بن ثابت الكوفي، وأبي يوسف يعقوب بن إبراهيم الأنصاري وأبي عبدالله محمد بن الحسن الشيباني رضوان الله عليهم أجمعين؛ وما يعتقدون من أصول الدين، ويدينون به رب العالمين… تعالى عن الحدود والغايات والأركان والأعضاء
“Gyai so osayan ko Aqeedah o Ahlus Sunnah wal Jama’ah sii ko okit o kiyapagosaya ron o mga Fuqaha ko agama a Islam: So Imam Abu Hanifah (Tabien), Imam Abu Yusof (Taabi Tabien), Imam Muhammad (Taabi Tabien): “Angiyas so Allah ko (sifat) a kalilimitado, mga kaposan, mga arkaan ago mga Anggawta.
(Source: Al-Aqeedah Tahawiyyah)
2. Phitaro o Olowan o mga Mufassireen ko mga Salaf, Imam Muhammad Ibn Jareer At-Tabari (224 AH – 310 AH):
وَلَهُ يَدَانِ وَيَمِيْنٌ وَأَصَابِعَ وَلَيْسَتْ جَارِحَة
“Aden a dowa yad (literal: lima) , yameen (literal: kawanan) ago asaabe’ (literal: mga kemer) o Allah ogaid na kenaba Anggawta”
3. Phitaro Imam o Ahlus Sunnah wal Jama’ah, Imam Ahmad bin Hanbal (rahimahullah) sii ko riwayat o Imam Khallal ago so Imam Abul Fadhl At-Tameemi:
إن لله تعالى يَدين وهما صفة له في ذاته ليستا بجارحتين
“Mataan ka so Allah na aden a dowa a Yad iyan ago gyoto na sifat o dhaat iyan ogaid na kenaba mga Anggawta…”
Source: العقيدة للإمام أحمد رواية أبي بكر الخلال (ص: 104)
IMANTO NA ILAYANGKA SO AQEEDAH O MGA SALAFI (IMANTO A MASA) A IPHAGANGKOB IRAN KO MGA SALAF
Phitaro i Shaykh Baraak (Salafi):
لا يقولون في هذه الصفات إنها ليست جارحة لأنه لفظ محدث ومجمل
(So mga Ahlus Sunnah) na kenaba iran di tharowa sangkanan a mga Sifat (lagid o Yad) a “Kenaba anan Anggawta”. Sabap sa gyanan a (katharo a “Anggawta”) na katharo anan a Inimbabago (Bid’ah) ago Mujmal (Kenaba Marayag)
Source: شرح العقيدة الواسطية (1 / 89 )
INENGKA:
Gyanan a katharo i Shaykh Baraak (Salafi) na miya-isaisa san so mga Olowan o mga Salafi lagid i Ibn Uthaymeen (Salafi) ago si Ibn Baz (Salafi) a iphesapar iran oba phagosara so “Anggawta” ko Allah kagiya kon a inimbabago (Bid’ah) anan a katharo. Di ran papakayn obangka tharowa a “So sifat o Allah na kenaba Anggawta”. Muhdath (Bid’ah) kon anan a katharo.
Ogaid na miyailay tano so mga Salaf lagid o Imam o Ahlus Sunnah wal Jama’ah a Imam Abu Hanifah (Tabien), Imam Abu Yusof (Tabi Tabien), Imam Muhammad (Tabi Tabien), Hujjatul Islam Imam Tahawi (Salaf), Imamul Mufassireen Imam Tabari (Salaf) ago so Imam Ahmad bin Hanbal (Salaf) ko riwayat o Abul Fadhl At-Tameeni (rahimahullah) na langon siran na piyakatanatana iran a so Allah na kenaba niyan sifat so Anggawta.
Aya den a pelawanan o mga Salafi na gyanan a mga Salaf ka aya iran piyaratiyaya na si Ibn Taymiyyah a kenaba ped ko mga Salaf. Aya piyakamemesa ron na so olowan iran a salafi a si Shaykh Ibn Baz na inisagda iyan so Imamul Mufassireen ko mga Salaf, Imam Ibn Jareer At-Tabari (rahimahullah) ko Aqeedah niyan a so mga Yad a pheka-aloy ko Allah na kenaba Anggawta.
So madakel a mga Salafi a miyosay ko Aqeedah Tahawiyyah na inisagda iran so kiyaopakatan a Hujjatul Islam ko mga Salaf a Imam Tahawi (rahimahullah) ka kenaba kon kepit o mga Salaf so phitaro iyan. Aya den a phamakaribat niran na so Salaf mismo a kiyaopakatan a Muhaddith ago Faqeeh ago aya pen a phitaro iyan mismo a gyanan a katharo iyan na gyanan mismo i Aqeedah o Imam o Ahlus Sunnah wal jama’ah ago Al-Imaamul A’dham (Phipaporoan a Imam) a da sakalaw ko Imam Abu Hanifah (rahimahullah) ago so kadandan o Ahlus Sunnah wal Jama’ah ko mga Salaf.
(Source: تعليق ابن باز على كتاب التبصير ).
THANODAN:
Sabap roo na gyanan a katharo iran a “Ba ami mambo piyakatana a Anggawta, sekano bo i miyamakatana ron?” na katii so dowa sembag ron.
1. Ino niyo anan phagizaan a piyakatanatana anan o pinakamala a Ulama iranon a Salafi sa Pilipinas ka Doktor den a “Anggawta” so mga Sifat o Allah. Isisingasinga iranon pen ago so mga ped iyan a Ustadh gowani ko di iran di pagosayn a aden kon a mga Anggawta o Allah. Aden a miyapanothol a phitawbatan iyan kon oto oriyan o debate i Mufti Nasrollah ago si Shaykh Nasroddin ogaid na da a miyailay ami a post iyan. Opama ka piyor a mitawbat sekaniyan na Alhamdulillah pero pira den i miyadadag iran pasi na go siran bo Tawbat, miyakapira polo ragon den a kababaloy iran a Ulama na pira mangaday i miyakaneg sangkanan a Aqeedah iran a Batil?
2. Jahalah (Di siran makaka-kaip) ko titho a Aqeedah o mga Salafi. Aya Aqeedah a kiyaopakatan ko mga Salafi na “Dingka phetaroon a Da a Anggawta o Allah ago Dingka pen phetaroon a Aden a Anggawta o Allah”. Aya maana niyan na saden sa tharo a “Anggawta so Sifat o Allah” odi na “Kenaba anggawta so Sifat o Allah” na langon anan na miyaulog sa Bid’ah.
3. Aya maana niyan na Bid’ah ko mga Salafi oba tharowa a “So Allah na kenaba Anggawta” ogaid na so mga Ahlus Sunnah ko mga Salaf na piyakatanatana iran a so Allah na kenaba Anggawta. Aya pakaiza na antaa mangaday ko mga Salaf i kekepit sangkanan a Aqeedah o mga Salafi?
Sabap roo a na tanto a miyakarayag a so mga Ashairah i titho a moonot ko Aqeedah o mga Salaf phakatanatanaan a so Allah na kenaba niyan sifat so Anggawta. So peman so mga Salafi na aya oonotan iran na so Manhaj ago Aqeedah i Ibn Taymiyyah kenaba so mga Salaf.
الله اعلم بالصواب