Antaoonon so mga Mujaddidoon?
Phitaro o Nabi (sallallaho alayhi wa sallam):
إِنَّ اللَّهَ يَبْعَثُ لِهَذِهِ الْأُمَّةِ عَلَى رَأْسِ كُلِّ مِائَةِ سَنَةٍ مَنْ يُجَدِّدُ لَهَا دِينَهَا
Maana: “Mataan ka so Allah na phakasimbowang niyan sangkai a Ummat oman magatos ragon so Mujaddid (Phakatiyolin) ko agama niyan”
Katawan den o mga Ulama a aya kilala a mga Mujaddidoon na kadakelan kiran na mga Shafi’i a aya manhaj iyan sa Aqeedah na Manhaj o Ashairah a Tafweedh ago Ta’wil. Kagiya di anan tharimaan o sabaad ko mga Salafi na aya den a initampar tano kiran na lagid iran bo a Salafi a si Dr. Muhammad Musa Al-Shareef (Salafi), Assistant Professor sa Department of Islamic Studies, King Abdul Aziz University, Saudi Arabia ago sii miya-doktor sa Ummul Qura University na inaloy niyan ko isa ko mga bayan so miyapanothol sa hadith ko mga Mujaddid o mga Islamic Historian na kadakelanon na mga Shafi’iyyah ago Ashairah.
Katii so mga ngaran a inaloy Dr. Muhammad Musa Al-Shareef (Salafi) a mga Mujaddid:
- Paganay a magatos ragon: Khalifah, Umar ibn Abd al-Aziz (rahimahullah) – Salaf
- Ika-dowa gatos ragon: Imam Ash- Shafi’i (rahimahullah) – Salaf
- Ika-telo gatos ragon: Imam Ibn Surayj As-Shafi’i (rahimahullah) – Ash’ari *
- Ika-pat gatos ragon: Imam Sahl al-Su`luki As-Shafi’i (rahimahullah) – Ash’ari
- Ika-lima gatos ragon: Imam al-Ghazali As-Shafi’i (rahimahullah) – Ash’ari
- Ika-nem gatos ragon: Imam Fakhruddin Ar-Razi As-Shafi’i (rahimahullah) – Ash’ari
- Ika-pito gatos ragon: Imam Ibn Daqiq al-`Id As-Shafi’i (rahimahullah) – Ash’ari
- Ika-walo gatos ragon: Imam Al- Hafiz al-Iraqi As-Shafi’i (rahimahullah) – Ash’ari
- Ika-siyaw gatos ragon: Imam Suyuti As-Shafi’i (rahimahullah) – Ash’ari
*Aya manhaj iyan na Manhaj o Ashairah a Tafweedhul Ma’na a piyaka-bid’ah o mga Salafi.
Ilayangkaman ka miyaginontolan angkoto a Salafi na inaloy niyan a matatago ron so mga Ashairah lagid o Imaam Ghazaali (rahimahullah) a aya ini-grar ron o morit o Ibn Taymiyyah (ghafarallaho laho) a so Imam Dhahabi (rahimahullah) na Hujjatul Islaam (Proof of Islam) sii ko kitab iyan a Siyar A’laamin Nubalaa.
Maaped pen sangkanan a mga Mujaddid so Imaam Fakhruddin Ar-Raazi (rahimahullah) a sekaniyan so phekararangitan a tanto o mga Salafi na katan bes a ped sekaniyan ko mga kiyabantogan a mga Mujaddidoon ko Agama sa sii den phepakapoon ko lagid iran a Salafi a si Dr. Muhammad Musa Al-Shareef. So mga Mujaddidoon na aya sarat iran na so Aqeedah iran na Haqq ago Linang a Aqeedah. Andamanaya i kapakatiyolina iran ko Agama amay ko so Aqeedah iran na binasa?
Aya pakaiza imanto na antaonon i khitoro o mga Salafi a Mujaddidoon iran oman magatos ragon a ped ko kiyadayuan a Aimmah sa Tafsir ago Fiqh? So mambo so phesaksian mambo a Ashairah. Ago ino mangaday a di kiran khaneg gyai a Hadith (o Mujaddidoon) bapiya pen miyakalala a Saheeh a Hadith?