Gyanan a ropaan a kan-dua a tanto a ipoporo so mbala a lima ka miyalepas iya so ulo na miyaopakat so mga Ulama a sii anan dinggolaolaa sii ko Salatul Istisqa ago sii ko mga dua a kanget odi na katapnay ko Allah. So kalilid a kan-dua na di sekaniyan iphoro a ba kalawani o lima so ulo o din-dua.
Miyamangbaal so Salaf a so Imam Ibn Hibban (rahimahullah) sa pamintoan ko kitab iyan sa bithowan iyan sa:
ذِكْرُ الْبَيَانِ بِأَنَّ رَفْعَ الْيَدَيْنِ فِي الدُّعَاءِ يَجِبُ أَنْ لَا يُجَاوِزَ بِهِمَا رَأْسَهُ
Maana: “So kaaloya ko osayan o kiporoon ko mbala a lima sii ko dua, wajib a di niyan kalawanan sa kaporo so ulo niyan”
Oriyan iyan na inaloy niyan so Saheeh a Hadith o Nabi (sallallaho alayhi wa sallam):
عَنْ عُمَيْرٍ مَوْلَى أَبِي اللَّحْمِ أَنَّهُ رَأَى رَسُولَ الله صَلَّى الله عَلَيْهِ وَسَلَّمَ عِنْدَ أَحْجَارِ الزَّيْتِ قَرِيبًا مِنَ الزَّوْرَاءِ يَدْعُو رَافِعًا كَفَّيْهِ قِبَلَ وَجْهِهِ لَا يُجَاوِزُ بِهِمَا رَأْسَهُ
Maana: “Miyakapoon ko Umayr Mawla Abi Al-lahm (radhiyallaho anho) a miyailay niyan so Rasulollah (sallallaho alayhi wa sallam) sii ko Ahjaar Az-Zayt a marani sa Az-Zawra a din-dua a ipoporo iyan so mga palad iyan makasasangor ko bontal iyan ( sii ko isa riwayat na di mamangni sa oran). Da niyan poroon so mbala a palad iyan sa ba kiyalawanan so ulo niyan”
(Sunan Abu Dawood, Saheeh Ibn Hibban ago so sanad iyan na Saheeh)
INENGKA:
So peman so ini-dalil iran a Hadith o Anas bin Malik (rahimahullah) na sii oto mitotompok ko Istisqa:
رَأَيْتُ رَسولَ اللهِ صَلَّى اللَّهُ عليه وسلَّمَ يَرْفَعُ يَدَيْهِ في الدُّعَاءِ، حتَّى يُرَى بَيَاضُ إبْطَيْهِ
Maana: “Miyailay aken so Rasulollah (sallallaho alayhi wa sallam) iniporo o Nabi (sallallaho alayhi wa sallam) so mbala a lima niyan sii ko dua taman sa miyailay so maputi a mbala irk iyan”
(Source: Saheeh Muslim)
Aya dalil iyan na so riwayat o Imam Bukhari (rahimahullah) na piyakatana o Anas bin Malik (rahimahullah) a sii oto sa Istisqa
كانَ النبيُّ صَلَّى اللهُ عليه وسلَّمَ لا يَرْفَعُ يَدَيْهِ في شيءٍ مِن دُعَائِهِ إلَّا في الِاسْتِسْقَاءِ، وإنَّه يَرْفَعُ حتَّى يُرَى بَيَاضُ إبْطَيْهِ
Maana: “So Nabi (sallallaho alayhi wa sallam) na di niyan iphoro so mbala a lima niyan sii ko mga dua niyan inonta sa Istisqa ago sabenar a ipheporo iyan taman sa mailay so maputi a mbala a irk iyan”
(Source: Saheeh Al-Bukhari)
INENGKA:
Gyanan a di tharo a so kon so kiporoon ko mbala a sii bo tatamana sa mga rareb na ka da sabot ko Agama na tanto den anan ko mala a katakabor ago kapangimporoan. Sabap sa amal anan o Majority ko mga Ulama a moonot ko Pat a Madhab sa Donya (Maliki, Hanafi, Shafi’i, Hanbali) ago gyanan pen i inaloy a kepit o mga kilala a Ulama o mga Salafi.
1. Phitaro i Ibn Uthaymin (Salafi):
قال ابن عثيمين قال العلماء يرفع يديه إلى صدره ولا يرفعهما كثيرا لأن هذا الدعاء ليس دعاء ابتهال يبالغ فيه الإنسان بالرفع بل دعاء رغبة ويبسط يديه وبطونهما إلى السماء هكذا قال أصحابنا رحمهم الله
Maana: “Phitaro o mga Ulama a iphoro so mbala a lima taman ko rareb ago di niyan iphoro a tanto sabap sa kenaba anan dua a katapnay ka phakasobraan o tao so khiporoon ko lima ka aya benar na dua anan a kasinganin… Gyanan i phitaro o mga inepeda ami (maana so mga Hanabilah).
(Source: As-Sharhul Mumti li Ibn Uthaymin)
2. Phitaro si Bakr Abu Zaid (Salafi):
يرفع الداعي يديه إلى منكبيه أو نحوهما
Maana: “Iphoro i din-dua so mbala a lima niyan taman ko mga waga niyan odi sii ko tampar iyan”
(Source: Tas-heehud Dua li Bakr Abi Zaid, Page 115)
THANODAN:
Sabap roo na andamanaya den i kiyatharowa ron o sabaad ko mga tao a da kon a sabot iyan ko agama so tao a ipheporo iyan so mbala lima niyan a da niyan lawani so ulo niyan sa kaporo? Batagolabao ron a aden a Saheeh a Hadith a pinggolaola anan o Nabi (sallallaho alayhi wa sallam) ago kepit anan o mga Salaf?Tanto anan a piyakamemesa ka lagid oba aya agama na sabo sa titindegan iran.
الله اعلم بالصواب